İqtisadiyyat Nazirliyi yanında Əmlak Məsələləri Dövlət Xidmətinin mayın 2-də keçirəcəyi hərraca 60 dövlət əmlakı çıxarılacaq. Bu barədə Dövlət Xidmətindən bildirilib. Hərraca 5 səhmdar cəmiyyətin səhm paketləri, 19 kiçik dövlət müəssisə və obyekti, 36 nəqliyyat vasitəsi çıxarılır. Səhmdar cəmiyyətləri sırasında nəqliyyat, inşaat, təmir sahələrinə aid müəssisələr var. Bu səhmdar cəmiyyətlərin səhm paketləri nizamnamə kapitalının 30-45 %-ni təşkil edir. Özəlləşdirilməyə çıxarılan dövlət əmlakları sırasında həmçinin, yardımçı təsərrüfat, əmlak kompleksi, iaşə obyekti, mağaza, yeraltı dayanacaq da var. Dövlət Xidmətindən bildirilib ki, Oğuz şəhərində yerləşən “Şahdağ” yeməkxanası turizm baxımından əlverişli mövqedə yerləşir. İlkin start qiyməti 56,6 min manat olan əmlakın ümumi faydalı sahəsi 113 kvadratmetr, torpaq sahəsi isə 40 sotdur. Hərraca müxtəlif növ nəqliyyat vasitələri də çıxarılıb. Nəqliyyat vasitələrinin ilkin start qiyməti 3,5 min manatla 11,5 min manat arasında dəyişir.
Commentaires